ألو .. قوّة .. مساء الخير .. شخبارك .. وش علومك
عسى ما أزعجتك بهذا الكلام العذب يا الغالي ؟
أنا جيت اعتذر منّك أبد ما جيت أنا آلومك
لأن اللي حصل منّي غصب عنّي وعن حالي
أحبّك .. من هنا لآخر سماك .. لأول غيومك
أحبّك .. لين ما يخضَرّ قلبك وإنت في بالي
أحبك .. كثر ما وصّى القمر .. لا قمت من نومك
يسَلّمْك المكــان ويتركك يا سيّدي عالي
وقبل لاأنسى .. صحيح البارحة زعّلت مخدومك ؟
أنا مدري ولكنّي سمعت الشمس من تالي
تقول إنك رفضت النور منها وغارت نجومك
حبيبي وش عليك إنت بكلامي .. وكثرة هبالي
تعال وخلّني أفتح شبابيك الغلا لــ يومك
تعال وكل شي فات إنّسى يا ضحكتي وفالي
أبتوسّع بحبّي لك ولو ضاقت بي هدومك
وأبرضي كل شبرٍ عاف أرضي وأزعل أميالي
مادام إنّك رضيت " يغور " حزنك "وإتخَسَا" همومك
ما دام إنّك ضحكت " الموت " بالحسرة لـ عذالي
أبفطر بك عشان إن قدّر الله وجيت ما آصومك
لأني ما تسحّرتك قبل لا تْغيب يا الغالي